જીવનમાં મોટા ભાગે – અને ઇન્ટરનેટની બાબતમાં તો ખાસ – આપણે સૌ ભૂતકાળને ભૂલીને ભવિષ્ય તરફ જ નજર માંડતા હોઈએ છીએ. પ્રગતિ માટે એ સારું જ છે, પણ ક્યારેક ભૂતકાળમાં નજર ફેરવી લેવાથી, ભવિષ્યને વધુ ઉજાળી શકાય છે.
અત્યારે ઇન્ટરનેટ આપણા સૌના જીવનનો એક અભિન્ન હિસ્સો છે. પીસી કે લેપટોપના સ્ક્રીન પરથી ઇન્ટરનેટ હવે મોબાઇલના સ્ક્રીનમાં સમાઇ ગયું છે અને હવે ટીવીના સ્ક્રીન પર પણ એ ફેલાવા લાગે એવા દિવસો આવી ચૂક્યા છે.
આજે ઇન્ટરનેટનો ઉપયોગ એટલો બધી વધી ગયો કે ઇન્ટરનેટનો સરેરાશ લોકો માટેનો ઉપયોગ માંડ પચીસેક વર્ષ પહેલાં જ શરૂ થયો એ માનવું પણ મુશ્કેલ લાગે.
ક્યારેય એવો વિચાર આવ્યો છે કે ગૂગલ શબ્દ કાને પડતાં જ અત્યારે જે લોગો અને વેબપેજ દિમાગમાં સળવળી ઉઠે છે એ લોગો અને એ વેબપેજ, ગૂગલના સાવ શરૂઆતના દિવસોમાં કેવાં હતાં? અથવા તો ઇ-બે કે એમેઝોન કે ફેસબુક જેવી સાઇટ જન્મી ત્યારે કેવી હતી અને ધીમે ધીમે, જુદા જુદા સમયના ગાળે કેવી રીતે વિકસી?
આ બધું આપણે એક નહીં, બે વેબસાઇટ પર જોઈ શકીએ છીએ. આ સાઇટ્સને ઇન્ટરનેટનાં મ્યુઝિયમ કહીએ તોય ખોટું નહીં.
