તમે દિવસની શરૂઆતમાં ઇન્ટરનેટ બ્રાઉઝર ઓપન કરો પછી મોટા ભાગે એવું બનતું હશે કે ધડાધડ ફેસબુક, જીમેલ, તમારી પોતાની કંપનીની સાઇટ અને અન્ય કોઈ ફેવરિટ સાઇટ જેવી ત્રણ-ચાર વેબસાઇટ એક સાથે ખોલી નાખતા હશો. દિવસ દરમિયાન આ બધી ફેવરિટ સાઇટ ઉપર નજર નાખતા રહેવાનું જરૂરી હોવાથી આપણે પહેલું કામ એ બધી સાઇટને વારાફરતી ઓપન કરવાનું કરતા હોઈએ છીએ.
જો તમે પણ આવી રીતે અમુક ચોક્કસ સાઇટ્સ દરરોજ ઓપન કરતા હો તો એ કામ તમારા બ્રાઉઝરને જ સોંપી શકો છો, જેથી આપણે બ્રાઉઝર ઓપન કરીએ એ સાથે એ પોતે જ આપણી ફેવરિટ સાઇટ્સ એક સાથે ઓપન કરી આપે. આ માટે…
ગૂગલ ક્રોમમાં..
- તમને જોઈતી સાઇટ્સ અલગ અલગ ટેબમાં ઓપન કરો.
- જમણી તરફની ત્રણ લીટી પર ક્લિક કરી સેટિંગ્સમાં જાઓ.
- તેમાં ઓન સ્ટાર્ટઅપ વિભાગમાં ‘ઓપન એ સ્પેસિફિક પેજ ઓર સેટ ઓફ પેજીસ’ ટીક કરો.
- સ્ટાર્ટઅપ પેજીસ પર ક્લિક કરો અને તેમાં યુઝ કરન્ટ પેજીસ પર ક્લિક કરીને ઓકે કરી દો.
- આપણને જોઈતી સાઇટ્સ પહેલેથી ઓપન ન કરવી હોય તો સ્ટાર્ટઅપ પેજીસ વિન્ડોમાં તેના યુઆરએલ વારાફરતી લખી શકાય છે.
ફાયરફોક્સમાં…
- તમને જોઈતી અલગ અલગ સાઇટ્સ ઓપન કરો.
- મેનુમાં ઓપ્શનમાં જાઓ.
- ડાબી તરફ જનરલ કેટેગરી પસંદ કરીને યુઝ કરન્ટ પેજીસ વિકલ્પ પસંદ કરી લો.
માઈક્રોસોફ્ટ એજમાં…
- મેનુ પર ક્લિક કરી સેટિંગ્સમાં જાઓ.
- ઓપન વિથ વિભાગમાં એ સ્પેશિફિક પેજ ઓર પેજીસ પસંદ કરો.
- કસ્ટમ પર ક્લિક કરીને મળતાં વિકલ્પમાં તમને જોઈતી વેબસાઇટ્સના યુઆરએલ એન્ટર કરી દો.
જો તમે નિશ્ચિત વેબસાઇટ્સ એક સાથે ઓપન કરવા ન માંગતા હો તો અગાઉ બ્રાઉઝ કરેલી બધી સાઇટ્સ, નવેસરથી બ્રાઉઝર ઓપન કરીએ ત્યારે ફરી ઓપન થાય એવો વિકલ્પ પણ જે તે બ્રાઉઝરમાં ઉપર આપેલા સેટિંગ્સમાં મળી રહેશે.
