પંખીની નજરે ન્યૂ યોર્ક શહેર

ધારો કે તમે અમેરિકા ફરવા ગયા છો અને ન્યૂ યોર્ક શહેરમાં એમ્પાયર સ્ટેટ બિલ્ડિંગની મુલાકાત લઈ રહ્યા છો. આ ગગનચૂંબી ઇમારતના 102મા માળે આવેલા ઓબ્ઝર્વેશન ડેક પરથી ચોતરફ વિસ્તરેલા શહેરની સ્કાયલાઇન ન જુઓ તો ન્યૂ યોર્કની મુલાકાત અધૂરી ગણાય છે. ઇમારતની ટોચે આવેલી અગાશીએથી ચારેતરફ નજર દોડાવીને જુઓ અથવા થોડા ડોલર કે સેન્ટ ચૂકવીને પેલા બાઇનોક્યુલરમાંથી જુઓ તો ન્યૂ યોર્ક શહેર કેવું દેખાય?

આ કલ્પના જેટલી રોમાંચક છે એના કરતાં વધુ મજાની હકીકત એ છે એ અનુભવ કરવા માટે આપણે ન્યૂ યોર્ક સુધી જવાની જરૂર નથી. એલેક્ઝાન્ડ્ર રેઝનિક નામના એક ફોટોગ્રાફરે આ ઇમારતની અગાશીએથી દેખાતા ન્યૂ યોર્ક શહેરનો 45 ગિગાપિક્સેલનો મહાકાય, 360 ડીગ્રી પેનોરમા તૈયાર કર્યો છે. સરખામણી માટે જાણવું જરૂરી છે કે આપણા સરેરાશ સ્માર્ટફોનના કેમેરામાં 8 કે 13 મેગાપિક્સેલના કેમેરા હોય છે અને 45 ગિગાપિક્સેલ એટલે 45,000 મેગાપિક્સેલ!

આ પેનોરમાને એરો-કીથી ફેરવી જોશો અને ઝૂમ કરશો ત્યારે તેની વિશાળતા સમજાશે.