આજે તમે બે-ચાર ક્લિક કરીને દુનિયાભરમાં પથરાયેલા તમારા મિત્રો સાથે સંપર્કમાં રહી શકો છો. યુએસમાં રહેતા દીકરાને ત્યાં પારણું બંધાય તો ભારતમાં રહેતાં દાદા-દાદી પલકવારમાં પૌત્રીનો હસતો ચહેરો જોઈને એનાં ઓવારણાં લઈ શકે છે. ભારતના મુંબઈમાં બેઠેલા ટીચર સિડની, લંડન ને ન્યૂ જર્સીમાં બેઠેલા સ્ટુડન્ટ્સનું એક સાથે ટ્યુશન લઈ શકે છે. ચારેય જણા એકમેક સાથે ચર્ચા કરી શકે છે ને કોમન વ્હાઇટ બોર્ડ પર મુદ્દાઓની આપલે કરી શકે છે.