ક્લાઉડ સંગ્રહ એટલે શું?

સવાલ લખી મોકલનારઃ વિનોદ અગ્રવાલ

વિનોદભાઈનો આખો સવાલ કંઈક આવો છે, “મારી પાસે મોબાઇલમાં ઘણા ફોટા અને વીડિયો સંગ્રહ થયેલા છે. ફોનમાં અમુક કોલ રેકર્ડ છે અને એમએમએસ પણ છે, જે મારા માટે બહુ અગત્યના છે, પણ ફોનની મેમરી ફૂલ થઈ ગઈ છે, તો આ બધું મારે ક્યાં સંગ્રહ કરવું? ઘણી વખત તમારા લેખમાં ક્લાઉડમાં સંગ્રહ કરવાની વાત કરેલી છે, પણ એમાં કંઈ ગડ પડતી નથી. તમે કહો છો તેમ ક્લાઉડમાં સંગ્રહ કરી લીધા પછી, જ્યારે જોઈએ ત્યારે કઈ રીતે મેળવી શકાય અને કેટલા સમય સુધી રહે તે પણ જણાવશો…

વિનોદભાઈ જેવો સવાલ ઘણા લોકોને સતાવતો હશે. આપણે પાયાની વાત જાણીએ.

આપણે જાણીએ છીએ તેમ આપણા કમ્પ્યુટરમાં આપણા કામકાજની ફાઇલ સેવ કરી હોય કે મોબાઇલમાં ફોટોગ્રાફ, ગીતો, વીડિયો, એસએમએસ વગેરે સેવ્ડ હોય તો તે ફાઇલ આપણા કમ્પ્યુટર અથવા મોબાઇલ, જે તે સાધનમાં જ સેવ થયેલી હોય. આ સામાન્ય સ્ટોરેજનો પ્રકાર થયો અને આપણે ઈ-મેઇલ કે ફેસબુકની સાઇટ ઓપન કરીને તેમાં બીજા લોકોએ અપલોડ કરેલ લખાણ, ફોટોગ્રાફ કે વીડિયો જોઈએ છીએ તે ક્લાઉડ સ્ટોરેજ થયું.

ટૂંકમાં, જે કંઈ ફક્ત આપણા કમ્પ્યુટર કે મોબાઇલની અંદર સેવ થયેલું હોય તે સામાન્ય સ્ટોરેજ અને જે કંઈ જુદાં જુદાં સાધનોમાંથી જોઈ શકાય એ ક્લાઉડ સ્ટોરેજ.