સૌથી પહેલાં તો, આપણી આ સહિયારી ‘સાયબરસફર’ ૧૭૫મા અંકના મહત્ત્વપૂર્ણ પડાવે પહોંચી છે, ત્યારે આપ સૌનો દિલથી આભાર! આ સફરને અનેક વાચકોનો હૂંફાળો પ્રેમ અને વિશ્વાસ સાંપડ્યા છે – આપના વિના આ ક્યારેય શક્ય બન્યું ન હોત.

વર્ષ ૨૦૦૮માં અખબારની એક નાની કોલમ સ્વરૂપે ‘સાયબરસફર’ની શરૂઆત થઈ ત્યારે આ લખનારના હાથમાં પણ પોતાનો સ્માર્ટફોન નહોતો (દુનિયાનો પહેલો આઇફોન ૨૦૦૭માં આવ્યો, એન્ડ્રોઇડ ફોન ૨૦૦૮માં આવ્યો અને ભારતમાં પહેલો સ્માર્ટફોન વર્ષ ૨૦૦૯માં આવ્યો.

એ સમયે આપણામાંથી ઘણા લોકો માટે કમ્પ્યૂટર અને ઇન્ટરનેટ જ નવી વાત હતી. ત્યારે એવું માન્યું હતું કે આ બંને સાધન કે માધ્યમમાં અપાર શક્તિ છે અને એનો સૌ સુધી પૂરો લાભ પહોંચાડવો હોય તો એનાં વિવિધ પાસાંમાં ઊંડા ઊતરવું જોઈએ. ‘ગમતાંનો ગુલાલ’ કરવાની ભાવનાથી સફરની શરૂઆત થઈ.

ત્યારથી આજે આપણે આર્ટિફિશિયલ ઇન્ટેલિજન્સ (એઆઇ)ના યુગમાં આવી પહોંચ્યા છીએ! પાછલાં વીસેક વર્ષમાં નવાં સાધનો, નવી ટેક્નોલોજીમાં ખાસ્સાં પરિવર્તનો આવ્યાં છે. એ કારણે આપણા સૌનું જીવન પણ ગજબની તેજ ગતિએ બદલાયું છે.