સફળતાનો કોઈ શોર્ટકટ નથી હોતો, પણ સ્માર્ટફોન કે પીસી/લેપટોપમાં કામ કરતી વખતે કેટલાક શોર્ટકટ્સ જાણી રાખ્યા હોય તો એ આપણા ધાર્યા કામમાં સફળતાને સહેલી ચોક્કસ બનાવે છે!
આપણા પીસી/લેપટોપના વિવિધ પ્રોગ્રામ્સ અને સ્માર્ટફોનમાંની એપ્સની મજા એ છે કે તેમાં એક જ કામ પાર પાડવાના એકથી વધુ રસ્તા હોઈ શકે છે. કોઈ રસ્તો ટૂંકો હોય તો કોઈ લાંબો હોય. આપણે કયો રસ્તો લઈએ એ મહત્ત્વનું નથી, બસ કામ થવું જોઈએ. એથી પણ વધુ મજાની વાત એ છે કે આ બધા પ્રોગ્રામ્સ, એપ્સ વગેરેમાં એટલાં બધાં ફીચર્સ હોય છે કે રોજેરોજ એનો ઉપયોગ કરતા હોઈએ તો પણ રોજ કંઈક નવું જાણવા મળે. આમાંથી કેટલીક વાત એવી નવી જાણવા મળે, જે આપણી રોજિંદી કામ કરવાની ઢબ ધરમૂળથી બદલી નાખે ને કામનો નવો ઉત્સાહ જગાવે.
