કોઈનો જીવ સ્માર્ટવોચને કારણે બચી શકે, એમ કોઈ કહે તો તમે માનો? એવું હકીકતમાં બન્યું છે!
ડૂબતા યુવાનને સ્માર્ટવોચનું તરણું મળ્યું
બન્યું એવું કે યુકેના અંતરિયાળ વિસ્તારમાં સાયકલિંગ કરી રહેલા એક સાયકલિસ્ટે સાયકલ પર જ એક નદી ઓળંગવાની કોશિશ કરી. એ જરા વધુ પડતો સાહસિક હશે, કેમ કે નદીમાં પૂર હતું, ધસમસતો પ્રવાહ હતો છતાં એણે એવી હિંમત કરી. પછી થવાનું હતું તે થયું. સાયકલ સાથે એ નદીના પ્રવાહમાં તણાયો.
જોકે એ સાહસિક હોવાની સાથે નસીબનો બળિયો પણ હતો. નદીના પ્રવાહમાં તણાતાં તણાતાં નસીબજોગે, કાંઠા પરથી નદીમાં ઝળૂંબી રહેલી એક ઝાડની ડાળી તેના હાથમાં આવી. ડૂબતો માણસ તરણું ઝાલે એમ તેણે ડાળી પકડી તો લીધી, પણ એના સહારે તે કાંઠા સુધી પહોંચે તેમ નહોતો.
