આજના ડિજિટલ યુગમાં, ડિજિટલ ગ્રાફિક્સનું ફિલ્ડ ગજબનું વિકસી રહ્યું છે. તમે એમાં ઝંપલાવવા માગતા હો તો ‘સ્કેચબુક’ નામના એક ફ્રી પ્રોગ્રામ પર હાથ અજમાવવા જેવો છે.

પાછલાં થોડાં વર્ષોમાં આપણા શિક્ષણ તંત્રમાં એક મજાનો ફેરફાર એ થયો છે કે હવે વિદ્યાર્થીઓને પોતાના ખરેખર રસના ક્ષેત્રોમાં આગળ વધવા માટે અનેક તકો મળવા લાગી છે. પહેલાં ગાડરિયા પ્રવાહ માટે કોમર્સ અથવા સાયન્સના જ મુખ્ય વિકલ્પ હતા. તમે આર્ટ્સ લો એટલે શિક્ષક થવાના એ લગભગ નક્કી થઈ જતું!

હવે આ આર્ટ્સનો કન્સેપ્ટ સાચી રીતે વિસ્તર્યો છે. પ્રોડક્ટ કે મટીરિયલ ડિઝાઇનિંગ, કમ્યુનિકેશન ડિઝાઇનિંગ, ગ્રાફિક-વેબ ડિઝાઇનિંગ, એનિમેશન અને વીએફએક્સ, ફેશન ડિઝાઇનિંગ, ઇન્ટરિયર ડિઝાઇનિંગ, આર્કિટેકચર વગેરે જુદા જુદા અનેક કોર્સ હવે ખાસ્સા લોકપ્રિય થતા જાય છે. આ બધા કોર્સ કે ક્ષેત્રના પાયામાં આર્ટ છે.