પાસવર્ડ મજબૂત હોવા જોઈએ એ આપણે બધા જાણીએ છીએ, પણ પાસવર્ડ પસંદ કરવાની વાત આવે ત્યારે ઘણા ખરા લોકો આ મુદ્દો ભૂલી જાય છે. તમે દુનિયાના બહુમતી લોકો સાથે છો કે નહીં, તે અહીં જાણી લો!આપણે વારંવાર અખબારમાં સમાચાર વાંચતા રહીએ છીએ કે યાહૂ, ફેસબુક, જીમેઇલ વગેરેના પાસવર્ડ લીક થયા અને યુઝર્સ પરેશાનીમાં મૂકાયા. ઘણી વાર એવું પણ બનતું હશે કે તમારા કોઈ પરિચિત તરફથી તમને કોઈ વિચિત્ર મેઇલ આવી પડે અને પછી એ પરિચિતે પોતાના બધા ઓળખીતાને કહેતા ફરવું પડે કે ‘ભાઈ, એ મેઇલ ધ્યાને લેશો નહીં, મેં મોકલ્યો નહોતો, મારું એકાઉન્ટ હેક થયું લાગે છે.’