આખરે આપણને પાસવર્ડ યાદ રાખવાની ઝંઝટમાંથી છૂટકારો મળે તેવા પ્રયાસો રંગ લાવી રહ્યા છે.
પાછલા મે-જૂન મહિનામાં બે મહત્ત્વની બાબતો બની. પહેલી બાબત આમ તો દર વર્ષે બનતી આવે છે. પહેલી મેનો દિવસ (ઇન્ટરનેશનલ વર્કર્સ ડે, અને ગુજરાત-મહારાષ્ટ્ર દિન ઉપરાંત) ‘વર્લ્ડ પાસવર્ડ ડે’ તરીકે ઉજવવામાં આવે છે. હેતુ લોકોને વધુ સલામત પાસવર્ડ અપનાવવા માટે જાગૃત કરવાનો છે, પરંતુ આ વર્ષે માઇક્રોસોફ્ટે પાસવર્ડને જ અલવિદા કહી અને કહ્યું કે હવે ‘વર્લ્ડ પાસવર્ડ ડે’ નહીં, ‘વર્લ્ડ પાસકી ડે’ ઉજવવાનો સમય આવી ગયો છે. કંપનીએ તો આ વર્ષે પહેલી મેના દિવસની વિશ્વના પહેલા ‘વર્લ્ડ પાસકી ડે’ તરીકે ઉજવણી પણ કરી!
