ભારતમાં બેન્કિંગ વ્યવસ્થા માટે વર્ષ ૨૦૨૧ ટેક્નોલોજીના ઉપયોગની દૃષ્ટિએ મોટા સિમાચિહ્ન રૂપ સાબિત થવાનું છે. જ્યારે વાત બેન્કિંગ અને રૂપિયાની હોય ત્યારે એ આપણે માટે પણ મહત્ત્વની હોય જ! આમ તો ભારતમાં આધાર નંબર અને ત્યાર પછી યુનિફાઇડ પેમેન્ટ ઇન્ટરફેસ (યુપીઆઇ)ની વ્યવસ્થા વિકસી ત્યારથી બેન્કિંગ ક્ષેત્ર અને આપણી પોતાની રોજબરોજની લેવડદેવડની પદ્ધતિમાં મોટા ફેરફાર આવી ગયા છે. આપણે શરૂઆતમાં ઓનલાઇન પેમેન્ટ અપનાવવામાં થોડા ખચકાયા, પરંતુ કોરોના વાયરસના પ્રસાર પછી સંપર્ક વિના રકમની લેવડદેવડનું મહત્ત્વ સમજાતાં વિશ્વના અન્ય દેશોની જેમ ભારતમાં પણ ઓનલાઇન ટ્રાન્ઝેકશનમાં રીતસર ઉછાળો આવ્યો છે.
