જે રોજ આપણી નજર સામે રહેતું હોય એના વિશે ઘણી વાર આપણે બહુ ઓછું જાણતા હોઇએ છીએ. જેમ કે આપણો ઘણો ખરો સમય જે ત્રણ સ્ક્રીન સામે જાય છે – સ્માર્ટફોન, પીસી કે ટીવી – એમાં કાચની પેનલમાં એવી તે શી કરામત થાય છે કે તેમાં આપણે જાતભાતનું બધું જોઈ શકીએ છીએ? આ ન જાણીએ તો બહુ નુકસાન નથી, ફક્ત સાયન્સ કે ટેકનોલોજીનો એક રસપ્રદ, જાણવાલાયક મુદ્દો ચૂકી જઈએ. પરંતુ સ્ક્રીનની જેમ હવે ચોતરફ જોવા મળતા ક્યૂઆર કોડ વિશે થોડું વધુ ન જાણીએ તો ક્યારેક આપણે સીધું જ રૂપિયાનું, ભારે નુકસાન વેઠવું પડી શકે.
