ઓગસ્ટ ૨૦૨૧માં એપલ કંપનીએ એક નવા ફીચરની જાહેરાત કરી, જેનો હેતુ સારો હોવા છતાં તે વિવાદાસ્પદ બન્યું છે. અત્યાર સુધી એપલ કંપનીએ તેના યૂઝર્સના ડેટાની પ્રાયવસી બાબતે હંમેશાં અત્યંત કડક વલણ અપનાવ્યું છે. આ માટે તે અમેરિકાની સરકાર કે એફબીઆઈ સામે પણ શિંગડાં ભરાવતાં ખચકાઈ નથી. પરંતુ હવે કંપનીએ કહ્યું છે કે તે તેની વિવિધ સર્વિસ અને ડિવાઇસમાંની ઇમેજીસને તપાસશે, બાળકોનું જાતીય શોષણ દર્શાવતી ઇમેજીસ સ્કેન કરશે, તેને અટકાવશે તથા કાયદાપાલક એજન્સીઓને આવી ઇમેજીસનું શેરિંગ અટકાવવામાં મદદ પણ કરશે.