તમારા કોન્ટેક્ટ્સને ડિજિટલ સ્વરૂપે અને ક્લાઉડમાં સાચવવા હિતાવહ છે.
ઓળખાણ મોટી ખાણ છે, આવું આપણે વર્ષોથી સાંભળતા આવ્યા છીએ અને વર્ષોથી એના લાભ પણ મેળવ્યા હશે, પણ, જો તમે ઓળખાણની ખરેખર મોટી ખાણ ઊભી કરી હોય, તમારા સંપર્ક લિસ્ટમાં અનેક લોકોનાં નામ હોય તો તમે અનુભવ્યું હશે કે ધીમે ધીમે આટલી બધી ઓળખાણ મોટી પળોજણ બની જાય છે!
પહેલાંના સમયમાં ઘરમાં ફોનવાળા ટેબલ પર એક ડાયરી અને પેન રહેતાં અને સૌનાં સરનામાં એ એક ડાયરીમાં ઉમેરાતાં જતાં. હવે આપણાં સંપર્ક સરનામાંનાં જ અનેક સરનામાં બની ગયાં છે. પોતાના ફોનમાં, વિઝિટિંગ કાર્ડ્સમાં, ઓફિસના કમ્પ્યુટર/લેપટોપમાં આઉટલૂક જેવી સર્વિસમાં, યાહૂ કે જીમેઇલ જેવી ઈ-મેઇલ સર્વિસમાં વગેરે કેટલાય ઠેકાણે સરનામાં વિખરાવા લાગ્યાં છે. પરિણામે જ્યારે જરૂર હોય ત્યારે પળવારમાં જોઈતો ફોનનંબર કે એડ્રેસ ન મળે એવું બની શકે છે, આજની ડિજિટલ દુનિયામાં પણ.
