અમેરિકાના પેનસિલ્વેનિયાની યુનિવર્સિટીમાં, એક સિક્યુરિટી સેમિનાર દરમિયાન, દક્ષિણ કેલિફોર્નિયાની યુનિવર્સિટીના ફ્રેડ કોહેન નામના એક વિદ્યાર્થીએ એક કમ્પ્યુટર કોડનું નિદર્શન આપ્યું, એ સાથે અત્યારે આખી દુનિયાનાં કમ્પ્યુટર્સને તાવ લાવતા વાઇરસનો જન્મ થયો. ફ્રેડ કોહેને એક મેઇનફ્રેમ કમ્પ્યુટરમાં પોતાનો કોડ દાખલ કર્યો અને પાંચ જ મિનિટમાં એ કોડે સિસ્ટમ પર અંકુશ જમાવી દીધો.