આવી ગયું છે ભારતનું પહેલું, ખાસ ભારતીયો માટેનું બ્રાઉઝર. આ બ્રાઉઝરની ખરી ખૂબી, મોઝિલા ફાયરફોક્સની વિવિધ ખાસયિતોનું સરસ રીતે ભારતીયકરણ કરવામાં છે.
હમણાં રૂપિયાનો ચોક્કસ સિમ્બોલ અપનાવીને ભારતે કરન્સીનો સિમ્બોલ ધરાવતા દેશોની યાદીમાં સ્થાન મેળવ્યું, તેમ સાયબરજગતમાં પણ એક સરસ પહેલ સાથે, ભારતે પોતાનું આગવું બ્રાઉઝર પણ મેળવ્યું છે.
બ્રાઉઝર એટલે શું એવો સવાલ મોટા ભાગના લોકોને તો નહીં જ થયો હોય, જેમને થયો હોય તેમના માટે આટલી સ્પષ્ટતાઃ બ્રાઉઝર એટલે આપણે ઇન્ટરનેટ જેની મદદથી સર્ફ કરી શકીએ તે સોફ્ટવેર. થોડા સમય પહેલાં આખી દુનિયામાં માત્ર ઇન્ટરનેટ એક્સપ્લોરર (આઇઇ)ની જ બોલબાલા હતી, મોઝિલા ફાયરફોક્સ આવતાં લોકોને ખબર પડી કે ઇન્ટરનેટ બીજા કોઈ સોફ્ટવેરથી પણ સર્ફ કરી શકાય ખરું! પછી તો ગૂગલનું ક્રોમ આવ્યું અને હવે લોકો પોતાની પસંદ અને મૂડ અનુસાર બ્રાઉઝર બદલતા થઈ ગયા છે.
હવે એમાં એક નામ ઉમેરાયું છે એપિક બ્રાઉઝરનું, જે ભારતનું પોતાનું, ખાસ ભારતીયો માટે બેંગલોરની એક કંપનીએ વિક્સાવેલું બ્રાઉઝર છે! આમ તો આ બ્રાઉઝર મોઝિલા ફાયરફોક્સ આધારિત જ છે, એટલે ફાયરફોક્સની મોટા ભાગની ખૂબો 
તેમાં છે, ઉપરાંત એમાં આપણને ભારતીયોને કામ લાગે એવી કેટકેટલીય ખૂબીઓ ઉમેરવામાં આવી છે. જેમ કે આમાં તમે વિવિધ ભારતીય ભાષાઓમાં સહેલાઈથી લખી શકો છે - તમે કહેશો કે એવું તો બીજાં બ્રાઉઝરમાં પણ શક્ય છે! વાત સાચી, પણ આમાં ખૂબી એ છે કે તમે એપિકમાં કોઈ પણ વેબસાઇટ કે બ્લોગ જોતા હો અને તેમાં તમારી કમેન્ટ ઉમેરવા માગતા હો તો કમેન્ટ બોક્સની ઉપર જમણે ખૂણે એક નાનકડું ડ્રોપડાઉન મેનુ જોવા મળશે, તેમાં તમે ગુજરાતી સિલેક્ટ કરી લો અને પછી અંગ્રોજીમાં લખશો એટલે લખાશે ગુજરાતીમાં! (આ કમાલ ગૂગલ ટ્રાન્સલિટરેશનની જ છે, પણ એપિકમાં એનો સ્માર્ટ ઉપયોગ કરાયો છે). તમારે બીજી કોઈ જગ્યાએ જઈ, ગુજરાતીમાં લખીને કોપીપેસ્ટ કરવાની કડાકૂટ જ નહીં.એટલે જ, હવે સાયબરસફર પર કમેન્ટ કે સૂચન આપવાનું તમારા માટે સહેલું થઈ જશે. એપિક ડાઉનલોડ કરી લો અને પછી સાયબરસફર એપિકમાં જ જુઓ. જ્યારે પણ કમેન્ટના બોક્સમાં કર્સર મૂકશો એટલે ગુજરાતીમાં લખવાનો ઓપ્શન મળી જશે (જો તમને આવું ડ્રોપડાઉન જોવા ન મળે તો સ્ક્રીનના ડાબી તરફના લિસ્ટમાં બીજા નંબરે ઇન્ડિકનો ઓપ્શન છે, તેના પર ક્લિક કરી,કરન્ટ ડિફોલ્ટ લેંગ્વેજ તરીકે ગુજરાતી પસંદ કરો અને ‘ઇનેબલ ઇન્ડિક ડ્રોપડાઉન ઇન ટેક્સ્ટબોક્સીઝ’ને ટીક કરીદો).
એપિકમાં ૧૫૦૦થી વધુ ઇન્ડિયન થીમ છે. www.epicbrowser.com પર જઈને એપિક ડાઉન
લોડ કરી, ઇન્સ્ટોલ કરી લો અને પછી એનો ઉપયોગ ચાલુ કરો સ્ટાન્ડર્ડ થીમ છે મસ્ત મજાનો મોર! પહેલી નજરે જ આ ભારત માટેનું બ્રાઉઝર હોવાનો પાક્કો અંદાજ મળી જાય. અચ્છા, તો હવે આ બ્રાઉઝરમાં શું શું ખાસ છે, જે બીજામાં નથી કે સહેલાઇથી મળતું નથી એ જાણીએ. બ્રાઉઝરમાં ડાબી બાજુએ જુદા જુદા આઇકન્સની આખી હારમાળા આપી છે. પહેલો જ આઇકન છે ઇન્ડિયાનો. એના પર ક્લિક કરશો એટલે એક કોલમ ખૂલશે જેમાં જુદી જુદી ભારતીય સાઇટ્સના અપડેટ્સ જોવા મળશે. ન્યૂઝ, હિન્દીમાં સમાચાર, ક્રિકેટ, શેરબજાર, લાઇવ ટીવી, મ્યુઝિક, વગેરે વગેરે કેટકેટલુંય, અને બધું જ ભારતીય! બીજો આઇકન છે ઇન્ડિકનો એટલે કે ભારતીય ભાષાઓનો. ઇચ્છો તો અહીં તમારી ભાષામાં લખીને કોપીપેસ્ટ કરો અથવા ઇન્ડિક ટ્રોપડાઉનનો ઓપ્શન ઇનેબલ રાખો તો દરેક વેબપેજ પર ટેક્સ્ટબોક્સમાં ઉપર સમજાવ્યા મુજબ ભારતીય ભાષામાં લખવાનો વિકલ્પ માઉસવગો રહેશે.
એપિકની વધુ એક ખાસિયત એ છે કે તેમાં એન્ટિવાયરસ પ્રોગ્રામ ઇનબિલ્ટ છે, ઉપરાંત માઇક્રોસોફ્ટ વર્ડ જેવું જ વર્ડ પ્રોસેસર પણ ઇનબિલ્ટ છે! અહીં લખીને ફાઇલ તમારા કમ્પ્યૂટરમાં સેવ કરી શકો. આ સિવાય, ફેસબુક, ટ્વીટર, ઓર્કૂટ, જીમેઇલ, યાહૂ વગેરે વગેરેના બુકમાર્ક્સ પણ છે, જે એપિકની અલગ કોલમમાં ઓપન થાય છે એટલે એક તરફ ટ્વીટર ઓપન રાખીને બીજી તરફ તમે વિવિધ સાઇટ્સ સર્ફ કરી શકો.
એપિકની વધુ એક મજા તેની બેકઅપ યુટિલિટીમાં છે. તમે તમારા જીમેઇલ એકાઉન્ટનો ઉપયોગ કરીને તમારા કમ્પ્યૂટર પરની ફાઇલનો ઓનલાઇન બેકઅપ રાખી શકો છો, જે ગમે ત્યારે, ગમે ત્યાંથી એક્સેસ કરી શકો. એપિક માટેની અલગ અલગ એપ્લિકેશનનો વિભાગ ખાસ જોજો, તેમાં ઘણી ઉપયોગી કરામતો છે.
તમને ભારતીય સાઇટ્સમાં સર્ફિંગમાં વધુ રસ હોય, તો એપિક અપનાવી લો, ચોક્કસ મજા પડશે!
