તમારા મોબાઇલમાં કૅમેરા છે? ગુડ, આગળ વાંચો. કૅમેરા નથી? નો પ્રોબ્લેમ, આ લેખ વાંચીને કૅમેરાવાળો મોબાઇલ લેવાનું મન થશે, આગળ વાંચો! તમારી પાસે ડિજિટલ કૅમેરા હોય તો પણ આ લેખ કામ લાગશે.
ધારી લો કે તમે કૉલેજના ક્લાસરૂમમાં છો (વેકેશનમાં આવું ધારવું મુશ્કેલ છે, છતાં ધારી લો!) અને પ્રોફેસરે આખું બોર્ડ ભરી દીધું છે, જેની નોટ્સ નોટબુકમાં ઉતારવી એ મોટી કડાકૂટનું કામ છે. અથવા ધારો કે તમે કોઈ મીટિંગમાં છો અને કોઈ ડોક્યુમેન્ટની કોપી કરવી જરૂરી છે, પણ ઑફિસમાં કોપીયર નથી. અથવા મ્યુચ્યુઅલ ફંડના એજન્ટ તમારી પાસે પાન કાર્ડની નકલ માગે છે અને કાર્ડ એવું આડે હાથે મૂકાઈ ગયું છે કે શોધ્યું જડતું નથી.
આવા બધા સંજોગોમાં કામ લાગે છે ક્વીપીટ (www.qipit.com) નામની સર્વિસ. પ્રોફેસરની નોટ્સનો ફોટો લો, ક્વીપીટ પર મોકલો અને દોસ્તો સાથે શેર કરો, ઇન્સ્ટન્ટલી!
આ માટે ખાસ કંઈ કરવાનું નથી. ક્વીપીટની વેબસાઇટ પર જઈને એક વાર તમારું એકાઉન્ટ ખોલાવો. એકાઉન્ટ એક્ટિવેટ થયા પછી તમારે કહેવાનું રહેશે કે તમે ડિજિટલ કૅમેરાથી કૅપ્ચર કરેલાં ડોક્યુમેન્ટ્સ આપશો કે મોબાઇલ ફોનથી. મોબાઇલ પસંદ કરો તો તમારી સર્વિસ પ્રોવાઇડ કંપની અને હેન્ડસેટની વિગત આપો. ડોક્યુમેન્ટ્સની ક્વૉલિટીનો આધાર હેન્ડસેટનો કૅમેરા કેટલો પાવરફૂલ છે તેના પર છે. ડિજિટલ કૅમેરાના કેસમાં, ફક્ત ૩ મેગાપિક્સેલના રેઝોલ્યુશનવાળી ઇમેજથી પણ તમને સરસ રીઝલ્ટ મળશે.
જો મોબાઇલમાંથી ઇમેઇલ કરવાની સગવડ હોય તો ઇમેજ ક્વીપીટને સેન્ડ કરો અથવા કમ્પ્યૂટર પર ઇમેજ ડાઉનલોડ કરીને પછી ક્વીપીટ પર અપલોડ કરો. એકથી વધુ પાનાંની ઇમેજીસ, ઇમેઇલમાં એક સાથે અટેચ કરીને મોકલી શકાય. ક્વીપીટ આપણાં ડોક્યુમેન્ટ્સની પીડીએફ બનાવીને તેને આપણા એકાઉન્ટમાં સ્ટોર કરી રાખશે. ત્યાંથી આપણે તેને ડાઉનલોડ કરી પ્રિન્ટ કાઢી શકીએ, કોઈને ફેક્સ કરી શકીએ કે ઇમેઇલ કરી શકીએ-મફતમાં!
આટલું વાંચતાં તમને સવાલ થવો જોઈએ કે આપણે કેપ્ચર કરેલા ફોટોને સીધા જ સ્ટોર કે ઇમેઇલ કરી શકાય છે, તો વચ્ચે આ ક્વીપીટની ખીટપીટની શી જરૂર છે? જરૂર એટલા માટે છે ક્વીપીટ લખાણના ફોટોગ્રાફને એકદમ ક્લીન કરીને, ચોખ્ખી પ્રિન્ટ કાઢી શકાય એવી પીડીએફમાં કન્વર્ટ કરે છે અને આ કામ માટે એ પેટન્ટેડ ટેક્નોલોજી વાપરે છે. સાદા ફોટો જેવી ઇમેજમાં આવું રીઝલ્ટ મળતું નથી.
ક્વીપીટમાં તમે ૧૦૦ ડોક્યુમેન્ટ્સ મફત સ્ટોર કરી શકો છો. વધુ ડોક્યુમેન્ટ્સ મૂકવાં હોય તો આગલાં ડીલીટ કરવાં પડે. પાનકાર્ડ, વોટર્સકાર્ડ વગેરે અગત્યના દસ્તાવેજને સાચવી રાખવા માટે પણ આ કામની સર્વિસ છે.
તો હવે લાગે છેને કે મોબાઇલનો કૅમેરા નવરાત્રિ સિવાય પણ ઉપયોગી છે?
તાજા કલમઃ અફસોસ, આ સર્વિસ હવે ફ્રી રહી નથી!
