આપણા ગુજરાતી કેલેન્ડર પ્રમાણે શરદ ઋતુ પૂરી થઈ, હવે હેમંત બેસશે, પછી શિષિર આવશે અને પછી છેક વસંત આવશે. એટલે કે અત્યારે તો પાનખર શરૂ થવાની તૈયારી છે અને વૃક્ષો નવી રોનક મેળવે એ દિવસો હજી દૂર છે. સાયબરજગતને આવા મજાના કુદરતી ઋતુચક્ર સાથે દૂર દૂરનો કોઈ સંબંધ હોય એવું લાગતું નથી, પણ તેમાં હમણાં નવા નવા ફેરફારોની મોસમ બેઠી લાગે છે. આપણા રોજબરોજના ઉપયોગમાં આવતા કેટલાક સોફ્ટવેરમાં હમણાં જે તાજા ફેરફારો થયા છે, એના પર એક નજર ફેરવી લઈએ...:
શરૂઆત ગૂગલિંગથી! ગૂગલે તેના સર્ચ એન્જિનના ઇન્ટરફેસમાં ફેરફારો કર્યા. અગાઉ વેબ, ઇમેજ, વીડિયો વગેરે સર્ચ કરવાના બધા વિકલ્પો સ્ક્રીનની ડાબી તરફ સૌની નજર સમક્ષ રાખ્યા હતા, તેને બદલે હવે ઉપર તેનાં ટેબ્સ બનાવીને વિકલ્પો તેની અંદર મૂકી દીધા છે. તમે કોઈ ઇમેજ સર્ચ કરતા હો તો તેની ચોક્કસ સાઇઝ, રંગ, પ્રકાર (ફોટોગ્રાફ, ક્લિપઆર્ટ, લાઇનડ્રોઇંગ) વગેરે વિકલ્પોને વધુ અંદર ધકેલી દેવામાં આવ્યા છે! અને હા, હવે તમે ગૂગલમાં માત્ર ચહેરા પણ શોધી શકો છો.
- સર્ચ પેજની જેમ જીમેઇલમાં પણ ઇન્ટરફેસમાં ફેરફાર થયા છે. નવો મેઇલ કમ્પોઝ કરવાનું હવે નવું બોક્સ ખૂલે છે, જેથી ઇનબોક્સનો સંદર્ભ આપણી નજર સમક્ષ રહે. પણ, મેઇલ ટેક્સ્ટના ફોર્મેટિંગના ઓપ્શન્સ - જે પહેલાં ટેક્સ્ટ બોક્સની ઉપર હતા તે - હવે નીચે, અલગ અલગ ટેબમાં મૂકી દેવામાં આવ્યા છે. આ ફેરફારોથી પહેરી નજરે સ્ક્રીન ચોખ્ખોચણાક લાગે, પણ જે તે વિકલ્પ સુધી પહોંચવા આપણે એક-બે વાર વધુ ક્લિક કરવી પડે.
- ગુજરાતી કે હિન્દીમાં જીમેઇલ લખવાના ઓપ્શનનું બટન સેટિંગ્સની અંદર હતું તેને બહાર લાવીને સેટિંગ્સની બાજુમાં મૂકી દેવાયું છે.
- હોટમેઇલના નવા અવતાર આઉટલૂકમાં મેઇલ એટેચમેન્ટની સાઇઝ એકદમ વધારી દેવામાં આવી છે, એ જ રીતે (કે એ જ કારણે!) હવે જીમેઇલમાંથી આપણે 10 જીબી સુધીનાં એટેચમેન્ટ મેઇલ કરી શકાય છે. અગાઉની લિમિટ આ રીતે એક ઝાટકે 400 ગણી વધારી દેવાઈ છે, પણ એમાં જીમેઇલે ખાસ કોઈ કરામત કરી નથી, ગૂગલ ડ્રાઇવને આ માટે કામમાં લેવામાં આવી છે.
- ધડાધડ નવાં વર્ઝન લાવી રહેલા ફાયરફોક્સનું હજી હમણાં 16મું વર્ઝન આવ્યાની ચર્ચા હતી ત્યાં 17મું વર્ઝન પણ આવી ગયું છે! ગૂગલ ક્રોમની તીવ્ર હરિફાઇની અસર હોય કે સોશિયલ મીડિયાની લોકપ્રિયતાનો લાભ લેવાની ગણતરી હોય કે બંને કારણ હોય, હવે ફાયરફોક્સમાં પણ ફેસબુકને સાંકળી લેવામાં આવેલ છે (અગાઉ આપણે આ જ ખાસિયત ધરાવતા રોકમેલ્ટ બ્રાઉઝર (www.rockmelt.com/)ની વાત કરી હતી, યાદ છેને?). ફાયરફોક્સમાં ફેસબુકનો પૂરો લાભ લેવા માટે ફાયરફોક્સનું લેટેસ્ટ વર્ઝન મેળવો, ફેસબુક પર લોગ-ઇન થઈ (www.facebook.com/about/messenger-for-firefox) પેજ પર જાઓ અને ત્યાં ટર્ન ઓન બટન ક્લિક કરો. હવે ફેસબુકની મેસેન્જર ફોર ફાયરફોક્સ સર્વિસ ઓન થઈ જશે અને તમારા ફાયરફોક્સ બ્રાઉઝરની અંદર જ, જમણી તરફ ફેસબુકનાં સ્ટેટસ, મેસેન્જર વગેરે જોવા મળશે!
કમ્પ્યુટરની સાફસફાઈ માટે ખાસ ઉપયોગી સીક્લિનર (www.piriform.com/ આપણે અગાઉ આ ફ્રી સોફ્ટવેરની વિગતવાર વાત કરી છે)નું પણ નવું વર્ઝન આવ્યું છે. તેમાં હવે ફાયરફોક્સ અને ગૂગલ ક્રોમ બંનેનાં એડ-ઓન્સ, એપ્સ કે પ્લગ-ઇનને મેનેજ કરવાની સુવિધા પણ ઉમેરવામાં આવી છે.- તમે પીસી કે લેપટોપનો ઉપયોગ ડીવીડી પ્લેયર અને ઓડિયો પ્લેયર તરીકે પણ કરતા હો તો એક અફલાતૂન, ફ્રી સોફ્ટવેર વીએલસી મીડિયા પ્લેયર તમારા ધ્યાન બહાર નહીં જ હોય. વીએલસી સંખ્યાબંધ ફોર્મેટ્સની ફાઇલ પ્લે કરી શકે છે. આ એક ઝડપથી અપટેડ થતું રહેતું પ્લેયર છે, તેમાં હવે તમે યુટ્યૂબના વીડિયોની લિંક આપીને તેને પણ તમારા ડેસ્કટોપ પર પ્લે કરી શકો છો. વધુ માહિતી મેળવો અહીં : http://www.videolan.org/
તો હવે તમે જ કહો, આ બધી વેબસર્વિસ/સોફ્ટવેરમાં આવેલા ફેરફારને ધ્યાને લેતાં તમે સૌથી પહેલાં કોને નવેસરથી અજમાવવી જોશો?
Share with friends
| Comments |
|
